قال الكاتب أحمد عاطف فياض إن مسلسل «كارثة طبيعية» من بطولة محمد سلام ينتمي لدراما حقيقة وليس من خيال المؤلف، مشيرًا إلى أن ولادة سيدة لـ 5 توائم حدثت كثيرا في مصر وهنا حالة مسجلة بولادة 9 توائم.
وأضاف السيناريست أحمد عاطف فياض، عبر «فيسبوك»: «إجابات سريعة على أسئلة بتتسئل لى كتير منذ نزول برومو كارثة طبيعية: المسلسل 10 حلقات هينزل حلقتين كل يوم أربعاء بداية من الأربعاء الجاى بإذن الله على WATCH IT، كارثة طبيعية مش مسلسل خيال علمى ولا حدث خارق للطبيعة.. هو قصة واقعية لزوج وزوجة مصريين عاديين بيمروا فجأة بحدث بيشقلب حياتهم تمامًا، والحدث ده ممكن يحصل لأى حد عادى وهى إن الزوجة بتحمل في 5 أطفال مرة واحدة كحالة توائم متعددة، ودى حالة حصلت كتير بالمناسبة في مصر والعالم كله والرقم القياسى المتسجل في مصر لحالات التوائم المتعددة هى ست جابت 9 أطفال في بطن واحدة واستضافها عمرو الليثى واللقاء موجود على اليوتيوب بس محدش يتفرج عشان مانكسبهوش أرباح».
وتابع: «نوع المسلسل بلاك كوميدي دراما».
وعن سؤاله عن مسلسل بالطو علق أحمد عاطف: «فين بالطو 2؟ مبسوط طبعًا جدًا إنكوا بعد سنتين ونص تقريبا لسه بتسألونى على بالطو 2 في كل مناسبة بس الحقيقة أنا مش عارف مين قال إن فيه بالطو 2، بالنسبة لى قصة دكتور عاطف خلصت وماكنتش حابب فكرة إنى أكتب جزء تانى لمجرد استغلال نجاح الجزء الأول بدون ما يكون فيه حاجة معينة عايزين نقولها من المسلسل، وده مكنش رأيي لوحدى، لأ كان رأى منصة واتشت بردو اللى كانت مقتنعة بنفس وجهة النظر، وكذلك أصدقائى الأعزاء عصام عمر وعمر المهندس كانو بيفكروا بنفس الطريقة دى وده نفس رأيهم».
وعن ظهور كمال أبورية في مسلسل كارثة طبيعية: «أيوه اللى شوفتوه في البرومو صح.. كمال أبورية معانا في المسلسل وبقينا أصدقاء جداً (اعترفت له في أواخر تصوير المسلسل على حوار إن أنا اللى اكتشفت مسلسل عزمى وأشجان بتاعه هو وفيفى عبده.. بس ده محتاج له بوست منفصل هبقى أحكيلكوا قالى إيه خلونا في كارثة طبيعية دلوقتى».