أكدت النجمة الكبيرة نبيلة عبيد، أن مسلسلها “يا ابنتى لا تحيرينى معك”، والذى يشهد عودتها للإذاعة المصرية بعد فترة غياب طويلة، يناقش الاختلاف في وجهات النظر وانعدام التواصل بين الأجيال، وبالأخص جيل الشباب الحالي وجيل الأباء والأمهات.
وقالت النجمة الكبيرة نبيلة عبيد في مداخلة هاتفية لتليفزيون اليوم السابع: “المسلسل بيناقش الإحساس بالجيل الحالي، وجيل الأم والأب مع شباب الأيام دى.. يعنى مهم جدا إن الرواية دى تتقدم فى الوقت ده، عشان نشوف الجيل ده، ونتعامل معاه إزاى.. ونظبط حاجات جايز ماتكونش مظبوطة.. عشان فيه أجيال كتير بتيجى، تتعلم إزاى يتعاملوا مع بعض.. عشان برضه فيه حاجات سلبية وفيه حاجات مش أحسن حاجة”.
وأضافت نجمة مصر الأولى نبيلة عبيد قائلة: “اسم المسلسل وعنوانه موضح الموضوع شوية، أكيد البنت عندها مشكلة.. فأكيد الأم حيرانة معاها، وتعبانة.. وهنا الربط بين الجيلين، الجيل اللى هو بتاعنا ده.. وجيل الشباب.. وربنا يوفقنا ونقدم حاجة كويسة للجمهور، وتبقى دى رسالة حلوة.. إلى جانب ده كله تكون الرسالة دى بتعالج مشكلة”.
نبيلة عبيد لـ اليوم السابع: مسلسلى الجديد بدأ بمكالمة هزار مع ابن إحسان عبد القدوس
وعن كيفية اختيارها لهذا العمل لتعود من خلاله للإذاعة المصرية، قالت عبيد: “أنا طبعا تربطنى علاقة قوية وطيبة بعائلة الأستاذ إحسان عبد القدوس الله يرحمه.. حرمه وأولاده.. أنا اتصلت بابنه مش فاكرة عشان إيه بالظبط.. فقالى ابنه: “يا ابنتى لا تحيرينى معك”، قولتله: “الله أبعتهالى على طول.. وقولتله على طول يلا بينا، ومن هنا بدأنا الاتصالات لتنفيذ العمل.. واللى هيخرجه ويكتب السيناريو والحوار الأستاذ أحمد فتح الله، وهو مخرى قوى جدا فى الإذاعة، وطبعا أستاذ أحمد المسلمانى ربنا يسعده، احنا بنسمع الإذاعة دلوقتى، يعنى أنا قلبى بيدق لما بنسمعها والتغييرات اللى حصلت خلال الفترة الأخيرة.. وطبعا رئيس الإذاعة اللى هو تحمس برضه معانا.. فالصراحة لقيت الحماس قوى جدا إلى جانب حماسى أنا شخصيا للرواية”.